К Тебе прибегаю аз, окаянный и паче всех человек грешнейший: вонми гласу моления моего, и вопль мой и стенание услыши.

Яко беззакония моя превзыдоша главу мою и аз, якоже корабль в пучине, погружаюся в море грехов моих.

Но Ты, Всеблагая и Милосердая Владычице, не презри мене, отчаяннаго и во гресех погибающаго; помилуй мя, кающагося во злых делех моих, и обрати на путь правый заблуждшую окаянную душу мою.

На Тебе, Владычице моя Богородице, возлагаю все упование мое.

Ты, Мати Божия, сохрани и соблюди мя под кровом Твоим, ныне и присно и во веки веков.

Аминь.

Призри с высоты святыя Твоея на мя, грешнаго (имя), припадающаго ко пречистому образу Твоему; услыши мою теплую молитву и принеси ю пред Возлюбленнаго Сына Твоего, Господа нашего Иисуса Христа;

умоли Его, да озарит мрачную душу мою светом Божественныя благодати Своея, да избавит мя от всякия нужды, скорби и болезни, да низпослет мне тихое и мирное житие, здравие телесное и душевное, да умирит страждущее сердце мое и исцелит раны его, да наставит мя на добрая дела, ум мой убо от помышлений суетных да очистит, исполнению же заповедей Своих мя научив, от вечныя муки да избавит и Своего Небеснаго Царствия да не лишит мя.

О Пресвятая Богородице! Ты, «Всех скорбящих Радосте», услыши и мя, скорбнаго;

Ты, именуемая «Утоление печали», утоли и мою печаль;

Ты, «Купино Неопалимая», сохрани мир и всех нас от вредоносных огненных стрел врага;

Ты, «Взыскание погибших», не попусти и мне погибнути в бездне грехов моих.

На Тя бо по Бозе вся моя надежда и упование.

Буди мне в жизни временней Заступница, и о жизни вечней пред Возлюбленным Сыном Твоим, Господем нашим Иисусом Христом, Ходатаица.

Научи мя Тому убо с верою и любовию служити, Тебе же, Пресвятая Мати Божия, Преблагословенная Марие, благоговейно чтити до скончания дней моих.

Аминь.

И не возгнушайся моих словес, о радосте моя!

Но призри мя и помилуй мя, о Мати Зиждителя моего!

Во время жития моего не остави мене: веси бо, Владычице, яко на Тя всю мою надежду возлагаю, и все упование мое о Тебе есть.

Темже и во время смерти моея предстани помощнице моя, радосте и утешение мое: не остави мене тогда, Надеждо моя, не посрами мене тогда.

Вем бо, вем, Дево, яко о многих гресех повинен есмь окаянный, и трепещу, помышляя час оный:

но Радосте моя, яви ми тогда лице Твое, удиви на мне милость Твою, ходатаице спасения моего, изыми мя, Владычице, от лютости бесовския и страшнаго и грознаго испытания воздушных духов: и от злобы их избави, и всю скорбь дне того на радость преложи Твоим посещением,

и сподоби безбедно прейти ми от начал и властей тьмы и достигнути поклонятися на Престоле славы седящем Христу и Богу нашему, со Безначальным Его Отцем и Пресвятым Духом, во веки веков.

Аминь.

Спаси мя смиреннаго и грешнаго раба Твоего:

Ты бо веси, Всемилостивая Госпоже, яко вся мою надежду по Бозе на Тя возлагаю, и несть ми инаго прибежища спасительнаго, токмо Ты, Всеблагая,

Ты моя крепость, Владычице, Ты моя сила, Ты мое Радование в скорбех, Ты мое Пристанище в искушениих, Ты мое Исправление в падениих, Ты и спасение мое всенадежное, о Мати Зиждителя и Господа моего!

Помози ми плавающему от потопления греховнаго.

Даждь ми руку помощи.

Помошнице моя, и избави мя от тимения глубины, да не погрязну в Бездне отчаяния; буря бо грехов и страстей возста на мя, и волны веззаконнй погружают мя.

Но Ты, Милосердая Мати, во пристанище Безстрастия настави и спаси мя, безнадежных Надеждо и Ходатаице спасения моего.

Спаси мя от всех враг моих, гонящих душу мою и различными искушеньими сию улавляющих.

На пути бо сем, по немуже хожду, многия сети сокрыша ми: мнози же соблазны, многия прелести, многия немощи духовныя и телесныя в падения греховная мя вовлекают; и что стоворю и отчаянный аз, неумею.

Аще бо восхощу покаятися, нечуствием и ожесточеннем одержим есмь; аще же плакати понуждаются, не имам сокрушения сердечнаго и слез поне единыя капли. Увы окаянства моего!

Увы Бедности моея!

Увы лишения моего!

К кому убо прибегну повинный аз, аще не к Тебе, Благосердная Мати Господа и Спаса нашего, ненадежных Надеждо, Стено и Покров к Тебе притекающих!

Не отрини мене сквернаго: Тебе бо едину в жизни моей стяжать утеху, Дево Марие Богородице, и к Тебе единей во всякой нужде прибегаю с дерзновением; не остави убо мене в жизни сей, и во время смерти моея предстани в помощь, помошнице моя,

да узрят Тя все врази мои и постыдятся, Тобою побежденнии, Ходатаице спасения моего.